NBA: Boston Celtics i afrohet titullit

Boston Celtics i është afruar një hap titullit të 17-të, rekord në NBA, duke përmbysur disavantazhin prej 20 pikësh në pjesë të parë dhe duke shënuar fitore 97-91 në ndeshjen e katërt finale.
Boston tash udhëheq me rezultat 3-1 dhe mund ta fitojë kampionatin në ndeshjen e të dielës, e cila zhvillohet në Los Angeles.

“Do të ishte ëndërr nëse dalim dhe e fitojmë titullin të dielën. Nuk dua të tej-eksitohem tash për një fitore. Këto momente janë të mrekullueshme, por do të jem në gjendje t’i gëzohem edhe më shumë kur gjithçka të mbarojë”, ka thënë Paul Pierce pas ndeshjes.

Pierce shënoi 20 pikë, derisa Ray Allen 19 për Celtics. Lakers u udhëhoqën nga Lamar Odom me 19 pikë, i ndjekur nga Kobe Bryant dhe Paul Gasol me nga 17 pikë.